Kategoria: Batera Bagera

Gune estali berriak, zerbitzuen modernizazioa eta Intxaurrondora sarrera eta irteera berria

Posted on by Eneko Goia

Donostiako alkategai Eneko Goiaren hautagaitzaren kideek Intxaurrondoko auzotarren proposamenak eta iradokizunak jaso dituzte Sagastieder plazan. Donostiako EAJ-PNVren hautagaitza-zerrendako kide Nekane Arzallusek azpimarratu du, Intxaurrondo auzo zabala eta anitza dela, gizarte zerbitzu ugari dituela, eta auzotarrekin elkarlanean aurre egin behar diegun beharrak dituen auzoa dela.

 

Horiek horrela, gune estali berriak sortzearen alde egin du, egun auzoari bizitza handia ematen dioten jarduerak eguraldi txarra egiten duenean ere egin ahal izateko. Hortaz, aditzera eman du, Donostia Kirola Zarategi pasealekuan petankan aritzeko gunea estaltzeko proiektua egiten ari dela. Izan ere, gune hori intxaurrondotarren elkargunea da. Eta era berean, gogorarazi du udan Intxaurrondo Ikastolako patioa estaltzeko lanak egingo direla, eta gunea eskola ordutik kanpo erabilgarri egongo dela.

 

Marrutxipiko lotunea eta irisgarritasuna

 

Era berean EAJ-PNVren hautagaiak pozik agertu dira Donostiako saihesbidetik auzoko sarrera eta irteera hobetzeko emandako irtenbidea dela-eta Marrutxipiko lotunearen bidez. Izan ere, lotuneak auzotarrek eskatutakoari erantzuten die, saihesbidearen bi norabideekin egingo da, eta ez die eraginik sortuko Etzieta eta Castelao parkeei.

 

Horren harian, egungo Mugikortasun zinegotzi eta jeltzaleen hautagaitzako kide Pilar Aranak honakoa esan du: “Egun auzora sartzeko Garberako biribilgunea erabili behar da, eta bertan trafiko handia egoten da. Beraz, lotune berriari esker trafikoa arinduko da. Gainera, Intxaurrondoko beheko aldeko auzotarrek azkarrago sartu eta irten ahal izando dute.

 

Gainera, Aranak nabarmendu du, auzoaren irisgarritasuna hobetzea dela hurrengo legealdirako Udalak izango duen erronketako bat. Eta helburua da Intxaurrondo Zaharra, Ipar Intxaurrondo eta Hego Intxaurrondoren arteko kohesioa hobetzea. Horrenbestez, adierazi du, mugikortasun bertikalaren zuzendaritza planaren bitartez Udala lanean ari dela irisgarritasuna segidako lekuetan hobetzeko: Zubiaurre pasealekua, Luistarrak eta Zarategi pasealekuaren artean; eta Zubiaurre pasealekua eta Mons pasealekuaren artean Irurak Taldearen bidez.

 

Kultur Etxeak eta Intxaurralde Zahar Etxea

 

Halaber, Jon Insaustik, egun Kultura zinegotzia eta Eneko Goiaren hautagaitza-zerrendaren kide, esan du, lanean jarraituko dutela Intxaurrondoko bi Kultur Etxeetan ematen diren zerbitzuak modernizatzeko eta hobetzeko.

 

Alde batetik, Larrotxene Kultur Etxearentzat plana dutela esan du: “Larrotxene erreferente da, batez ere, ikusentzunezkoan. Kultur Etxeak hobekuntzak behar ditu eraikinaren barruan, baita bideo zerbitzuan ere. Azken hau, gainera, gazte askok erabiltzen dute euren proiektuak garatzeko”. Bestetik, Felix Gabilondo plazan dagoen Kultur Etxeari buruz, honakoa adierazi du: “Behin ikusita 2018ko udan irekitzeak emaitza ona eman zuela, 2019an ere udan irekitzeko asmoa dugu”.

 

Azkenik, hautagai jeltzaleek garrantzia eman diote adineko pertsonentzako zerbitzuak hobetzeari. 2017ko irailean Intxaurrondo Zaharreko Aitona-Amonen Etxeak egoitza berria estreinatu zuen. Egoitza hori auzotarren elkargunea da. Eta orain, Udala lanean ari da Intxaurralde Jubilatuen Elkarteak egoitza berria izan dezan. Egun Txara I-eko lokal batean daude, eta egoitza berria Zarategi pasealekuan egingo da, lokal handiago eta berri batean. Horretarako, Udalak 472.000 euroko aurrekontua du.

Eneko Goia: “Gobernu Zibilaren eraikina Amarako elementu dinamizatzailean bilakatzea nahi dugu”

Posted on by Eneko Goia

Donostiako alkategai Eneko Goia eta bere taldea Amarako Pio XII plazan izan dira gaur goizean auzotarren proposamenak eta iradokizunak jasotzen. Gobernu Zibilaren eraikina atzean zuela, Goiak esan du, lanean jarraituko dutela auzoaren erdigunean dagoen eraikina berreskuratzeko eta, bertan, azpiegitura hobeak eta berriak jartzeko.

Horren harian, hautagai jeltzaleak gogorarazi du, legealdi osoan zehar Espainiako gobernuei eskatu dietela eraikina hiriari emateko, baina ezezkoak baino ez dutela jaso. Horiek horrela, Eneko Goiak honakoa azpimaratu du: “Ez dugu etsiko eta lanean jarraituko dugu eraikina hiriarentzako lortzeko, izan ere, Amarako elementu dinamizatzailean bilakatzea nahi dugu”.

Goiak esan duenez, helburua da Gobernu Zibila auzoari irekitzea, eta segidakoa gaineratu du: “Eraikinaren egungo ergoerak ez dio auzoari mesederik egiten eta, beraz, gure lana da eraikina berreskuratzea eta, bertan, udal zerbitzu hobetuak jartzea. Horrenbestez, erantzuna emango diogu amaratarrek gehien eskatzen dutenari”.

Bide-orria

Era berean, EAJ-PNVren Donostiako alkategaiak Amara biziberritzeko hainbat proiektu aipatu ditu, besteak beste, Karlos I-ko azpiko pasabidearen gunea, edota Isabel II, Felipe IV eta Gregorio Ordoñez kaleak: “Helburua da Amaratarrek disfrutatzeko guneak irabaztea. Hau da, oinezkoak protagonitak izango diren guneak, betiere, hiri-paisaia hobetuz eta auzoa birsortuz”.

Horrenbestez, Eneko Goiak adierazi du, bide-orria prest dutela auzoaren birsortzea garatzeko, eta horri esker, besteak beste, Pio XII-ko autobus geltoki zaharra hartzen zuen gunea berritu dela, Merkatarien, Etxeberrien edo Kofradien plazak birmoldatu direla, edo hainbat kale 30 gune bihurtu direla.

Hortaz, Goiak honakoa esan du: “Konpromiso sendoa dugu bide-orri horrekin jarraitzeko eta, besteak beste, segidako proiektuak garatzeko: Irun plaza inguruko kaleetako espaloiak zabaltzeko proiektua, Ikasketa plaza hobetzeko proiektua – Udalaren 2019ko aurrekontuan milioi bat euro daude – edo Karlos I-ko azpiko pasabidea birmoldatzeko proiektua – onbidean uda hasieran errealitate izango da –“.

Donostiarentzat Loiolako kuartelak berreskuratzeko ezinbestekoa da EAJ-PNV Madrilen erabakigarri izatea

Posted on by Eneko Goia

Donostiako alkategai Eneko Goiaren ustez, ezinbestekoa da lortzea EAJ-PNVren bozak erabakigarriak izatea Kongresuan eta Senatuan, izan ere, horrenbestez, egunen batean lortuko dugu Loiolako kuartelak hiriarentzat berreskuratzea. Goiak adierazi du, Espainiako hainbat gobernuk, bai PPren aginteko gobernuek, bai PSOEren aginteko gobernuek, bazterrak nahasi dituzte. Eta egun militarrak dauden tokia estrategikoa da hiriaren garapen urbanistikoarekin jarraitzeko. Izan ere, bertan, 1.500 etxebizitza eraikitzeko lurra dago.

Adierazpenok egin ditu Eneko Goiak Loiola auzoan. Bertan izan dira Donostiako alkategaia eta EAJ-PNVren Kongresurako eta Senaturako hautagaiak, besteak beste, Aitor Esteban, Joseba Agirretxea, Iñigo Barandiaran edo Maribel Vaquero.

Goiaren iritziz, Espainiako gobernuek urte dezentez bazterrak nahastu dituzte, eta entzungor egin diote hiriak behin eta berriro egindako eskariari, hain zuzen ere, Loiolako kuartelen lursaila berreskuratzeko, zein kartzela berria eraikitzeko eskariei.

Horren harian, Donostiako alkategaiak honakoa esan du: “Bi eremu horiek estrategikoak dira hiriaren garapena Urumearen ibarretik jarraitzeko. Bertan, Loiola eta Martutene artean, aurreikusita dago 2.000 etxebizitza baino gehiago egitea, betiere, hirian duen etxebizitza beharrari aurre egiteko. Baina, bai PPren aginteko gobernuek, bai PSOEren aginteko gobernuek behin eta berriro atzeratu dituzte horien gaineko erabakiak, hain zuzen ere, lehenago edo beranduago hartu beharko dituzten erabakiak”.  “

Eneko Goiaren ustez, eskari horiek lortzeko modurik onena da EAJ-PNVren bozek Madrilen erabakigarriak izatea. Izan ere, horrenbestez, lortuko dugu Espainiako Gobernua negoziatzea Militarren lekualdatzea eta lur horiek hiriarentzat berreskuratzea.

Goiak gogorarazi du, Donostiako alkate denetik behin eta berriro eskatu diela PPren zein PSOEren aginteko gobernuei bi eremu horientzako irtenbidea, baina erantzuna ez duela izan.

Eta kuartelen kasua azpimarratu du Eneko Goiak, izan ere, ez du zentzurik horrelako azpiegitura bat hiri barruan egoteak, eta are gehiago ikusita egun militarrek duten beharra baino azpiegitura handiagoa dela. Horiek horrela, Donostiako alkategaiak esan du, konponbide bat lortzeko hainbat aukera planteatu dituela, baina erantzunik ez.

Martuteneko kartzelari buruz, Eneko Goiak segidakoa adierazi du: “Orain beste proiektu bat aurkeztu digute, eta proiektu hau azken urteetan aurkezten diguten hirugarrena da. Eta ondorioz, ez dugu kartzela berria izango hurrengo lau edo bost urtetan”.

Hortaz, Donostiako hautagai jeltzaleak gogoratu du Martuteneko kartzela Estatuko zaharrena dela, eta kartzela ixtea duintasun kontua dela, izan ere, bertan dauden presoei ematen dien bizi-kalitatea ez da behar denaren gutxienekoetara iristen. Eta, gainera, egungo kartzela bertan mantentzea Txomineneako bigarren fasea oztopatzen ari da, non eta 700 etxebizitza eraikitzea aurreikusten den.

Donostiarako onurak

Eneko Goiak, halaber, EAJ-PNVk legealdi honetan aurrekontuen negoziazioetan lortutakoak azpimarratu ditu, izan ere, Euskadirentzat zein Donostiarentzat onura handiak ekarri ditu.

Goiak gogorarazi du, negoziazioari esker, talde jeltzaleak hainbat milioi eurotako inbertsioa lortu dituela Donostiarentzat. Horrenbestez, hautagai jeltzaleak segidako lorpenak aipatu ditu: Abiadura Handiko Trenaren geltokia; Loiolako Erriberetako garraioz aldatzeko geltokia; Martuteneko trena gurutzatzeko pasabidea kentzea; bost milioi euroko inbersioa CIDETECen ikerketak egiten jarraitzeko; milioi eta erdi Kontxako baranda berritzeko; hiru milioi euro Matia Fundazioak adineko pertsonentzako etxebitza-proiektua egiteko; eta Zinemaldiko, Hamabostaldiko, Aranzadiko edo Eusko Ikaskuntzako diru-laguntzak handitzea.

Eta horrek guztiek erakusten dute Goiaren iritziz, Madrilen Euskadiren eta Donostiaren interesak hobekien ordezkatzen dituen alderdia EAJ-PNV dela.

Azkenik, Eneko Goiak honakoa azpimarratu du: “Batzuk Madrilen egon ala ez pentsatzen duten bitartean, eta beste batzuk euren Espainiako zuzendaritzek esaten dutenari men egiten dioten bitartean, EAJ-PNVk Madrilen gogotsu lan egiten du Euskadirentzat etekin handiena lortzeko. Eta horrek donostiarron eta euskal herritarron bizitza hobetzea dakar, izan ere, Hiria eta Herria hobetzen jarraitu dezakegu”.

Oletako behatokia prest Altzako auzotarrei harrera egiteko

Posted on by Eneko Goia

Donostiako alkate Eneko Goiak eta Euskal Trenbide Sarearen zuzendari Aitor Garitanok Oletako Behatokia bisitatu dute gaur goizean. Behatokia bihar, osteguna, irekiko da.

Proiektua elkarrekin finantzatu dute Donostiako Udalak eta Eusko Jaurlaritzak eta, horri esker, aprobetxamendurik ez zuen lekua eta Herrera eta Altza arteko Topoaren zatia egiteko erabili zen lekua, plaza publiko batean bilakatu da, inguru guztia birsortuz.

Hiritarrei irekitako behatoki-aparkaleku bihurtzeko lanek bederatzi hilabete iraun dute, eta guztira bi erakundeek 700.000 euroko inbertsioa egin dute. Eta inbertsio horri esker, Oleta kalitatezko hiri-eremuan bilakatu dute, hain zuzen ere, harmaila duen plaza-behatokia, oholtza, gune berdeak, piknik gunea eta 28 autoentzako, 12 motorrentzako eta auto elektrikoentzako aparkalekua duen hiri-eremua.

Bertan, argiteria jarri da, oholtzan ekitaldiak egiteko argindarra, bakarrik garbitzen den komuna, iturria, bankuak eta lorategiak daude. Hau da, hiritarrentzat gune irekia sortu da, hain zuzen ere, auzoaren ardatza izan nahi duen gunea.

Lur-sailaren goiko aldean aparkalekua jarri da, eta behean aldiz, Pasaiako badiarako bista duen pasealeku-behatokia. Erdiko zatia harmailan egin da, eta aparkalekua eta pasealekua lotu egiten ditu, eta bertan, plaza handia sortu da, hiritarren aisialdi eta egoteko gune izateko.

Era berean, proiektuak gune berriaren irisgarritasuna bermatzen du Herrera pasealekutik. Gainera, Herrera pasealekuko espaloia 2 metro izatetik 3,75 izatera pasa da, eta beraz, bertatik oinezkoen igarotzea errazten du eta segurtasuna bermatzen du.

Aparkalekurako sarrera eta irteera semaforo baten bidez arautua egongo dia. Eta aparkalekuak 500 m2ko azalera du. Plazak, aldiz 700m2ko azalera du eta egurrezko plataforma bat du, hain zuzen ere, oholtza bezala erabiliko den 150m2ko (10 x 15 m) egurrezko plataforma.

Topoaren tunelaren aireztatze burdin-sarea gunean bertan integratu da eta harmailan dagoen lorategiaren zati batean kokatu da.

Erabateko konpromisoa dugu Donostiarekin eta donostiarrekin

Posted on by Eneko Goia

Donostiako alkate eta berriro alkate izateko EAJ-PNVren hautagai Eneko Goiak, alderdi jeltzaleak maiatzaren 26ko udal hauteskundeetarako hautagai-zerrenda aurkeztu du. Ekitaldia Miramongo Teknologia Parkearen atondoan izan da eta, bertan, parte hartu dute, besteak beste, hautagai-zerrendako kideek, Gipuzkoako Diputatu Nagusigai Markel Olanok, eta Gipuzko Buru Batzarreko presidente Joseba Egibarrek.

Eneko Goiak azpimarratu du, hautagai-zerrenda osatzen duten emakume eta gizonen erabateko konpromisoa Donostia eta donostiarrekin, eta honakoa gaineratu du: “Egun inoiz baino beharrezkoa dira, entzuten jakitea, elkarrizketa, eta akordioak lortzeko gaitasuna izatea, Eta hori da azken lau urteotan egin duguna, eta egiten jarraituko duguna etorri daitekenari aurre eginez”.

Horiek horrela, Goiak adierazi du, hilabete biziak datozela, izan ere, maiatzaren 26ko hauteskundeak baino lehen, apirilaren 28an beste hauteskude batzuk izango direlako. Eta esan du batari zein besteari aurre egiteko errezeta bera dela: EAJ-PNV. Horren harira, Donostiako alkategai jeltzaleak honakoa azpimarratu du: “Espainian hurrengo hilabeteetan ikusiko dugun liskar, irain, elkarrizketa eza, zarata eta suminaren aurrean, Donostian eta Euskadin egonkortasunaren, akordioen eta aurrera egitearen bidetik jarraituko dugu, eta beti, EAJ-PNVren egiten jakiteari esker”.

Ilusio handiz etorkizunari begiratzen dion Donostia

Eneko Goiak esan du, lau urte hauetan Donostiako etorkizunaren oinarriak ezarri dituztela, hain zuzen ere, aldarrikatu genuen ‘bestelako Donostiaren’ oinarriak; etorkizunari ilusio handiz begiratzen dion Donostiaren oinarriak. Hortaz, Goiak adierazi du, hiri bikaina, bizia, irekia, eta etorkizun, ekimen eta nortasun handiko hiria dela. Eta, bertan, proiektu asko errealitate bihurtu direla, hain zuzen ere, garraio publikoaren aldeko apustutik, hiriaren ardatz  berria den Urumeako ibarraren birsorkuntzara doazen proiektuak.

Donostiako alkategai jeltzaleak, halaber, honakoa esan du: “Donostiak apostu sendoa egiten du, kulturaren, berrikuntzaren eta gizarte kohesioaren alde. Izan ere, Donostiak gaitasuna du, hiritarrentzat oparotasuna sortzeko, eta erreferente da zientzian, berrikuntzan, kulturan, ingurumenarekiko konpromisoan, turismo jasangarriaren kudeaketan eta bizikidetzan”.

Hurrengo erronkak 

Goiak gaineratu du, lau urte hauetan lan egin dutela donostiarren ongizatea hobetzeko, auzo guztietan proiektu eta zerbitzu berriekin, eta Donostia hiri kohesionatu bat eginez, hain zuzen ere, hiritarrei bizi kalitate hobeagoa eskaintzen dien hiria eginez.

Hiriak dituen erronken artean, hautagai jeltzaleak honakoak izendatu ditu: “Gazteek euren bizitza proiektua Donostian gauzatu dezaten etxebizitza politiketan lan egitea; adinean gora doan hiri lagunkoia eraikitzea; kanpotik datozenekin elkarbizitzen ikastea; hiri kohesionatuago bat eraikitzea; emakumeen eta gizonen arteko berdintasun erreala lortzea; edo gure nortasuna mundu zabal honetan indartzea”.

Ilusioz beteriko taldea

Eneko Goiaren ustez, erronka horietan guztietan aurrera egiteko, beharrezkoa da akordioak lortzeko gaitasuna izatea: “Eta lau urte hauetan erakutsi dugu badugula gaitasuna. Izan ere, guztiekin hitz egin dugu, ez dugu posizio dogmatikorik izan, eta erakundeen arteko elkarlana sustatu dugu”.

Hortaz, Goiak segidakoa azpimarratu du: “Orain aurrerapausoak ematen jarraitu behar dugu, Donostiak gehiago nahi duelako. Eta horretarako, EAJ-PNVk ilusioz beteriko taldea aurkezten du, hain zuzen ere, esperientzia, kudeaketa zorrotza eta ekarpen handiak egingo duten inkorporazio berriak dituen taldea. Donostiak aurrera egin dezan bere onena emateko prest dagoen taldea”.

Horrenbestez, Eneko Goiak honakoa esan du: “Maiatzaren 26an aukeratu beharko dugu atzera egin nahi dutenen eta aurrera egiten jarraitu nahi dugunon artean. Eta argi eta ozen esan behar dugu, egun hemen gauzak ondo egiten direlaren bermea EAJ-PNV dela”.

Batera bagera, Donostia!

Posted on by Eneko Goia

Manifestua

Hiri bizi bat etengabeko eraikuntzan doa, baina ez zentzu arkitektonikoan soilik. Hiri biziak egunero eraikitzen ditu harreman berriak, aukera ekonomikoak, kultur itunak, bizikidetzarako zubiak. Donostia herritarren isla da, horregatik da hain  bizia.

Gure hiria trabatuta zegoen, katigatuta, ez aurrera ez atzera, eta berriz martxan jartzea erabaki zuen. Agintaldi honetan, alkate gisa, herritarren helburu eta behar nagusiei erantzutea izan da nire lehentasuna. 

Hiriak bizitasuna berreskuratu du. Gaur, Donostia, duela lau urte baino dinamikoagoa da, askotarikoagoa, indartsuagoa. Baina oraindik asko dago egiteko. Etxebizitza eskuratu ahal izateak, talentudun jendea erakartzeak edo inbertsioek ilusioa eskatzen dute, kudeaketa eraginkorra, eta baita herritarren partaidetza ere, denon artean irtenbideak aurki ditzagun.

Donostiak zer izan nahi du bihar? 2015ean aurrera egin nahi zuten donostiarren alternatiba izan ginen. Aurten, berriz ere, gure etorkizun hurbila aukeratu eta erabaki beharko dugu. Batera Bagera DONOSTIA!aukeratu dugu goiburu, aurrera egiteko gure erronka zein den argi azaltzen duena. Orain zuri dagokizu aurrera egiten jarraitu edo duela lau urteko egoerara itzuli nahi duzun erabakitzea.

Hasitako bideari eusteko ilusio eta indarrez beterik aurkeztuko naiz alkatetzara.  Donostia zerbitzatzea erabaki pertsonala da. Hiri honekin dudan konpromisoak narama horretara, Donostiarekiko dudan leialtasun eta maitasunak. Donostiako gizon-emakumeen ongizatea ardatz eta helburu argi bat jomugan: aurrera egiten jarraitu, bizi garen hiria amesten dugun hiria bihur dadin.

Eneko Goia Laso

Donostiar guztien alkategaia