Kategoria: Orokorra

Ez da erraza izan, baina uste dut San Bartolome Muinoa sozietatearen kontseiluari merkataritza-gunea eta aparkalekua egiteko kontratua eteteko proposamena egiteko erabakia hartzea beharrezkoa dela. Horrenbestez, ibilbide berri bati hasiera eman diogu, hain zuzen ere, ondorioak izango dituen eta beste hainbat erabaki hartzera eramango gaituen ibilibdea.

 

Historia pixka bat

 

Baina egin dezagun historia pixka bat. San Bartolome eremuaren birrantolaketaren gaineko hainbat epairen ondoren, 2008an San Bartolome Muinoa sozietatea eratzeko erabakia hartu zen eremu horretan jabetzak zituzten pertsona eta erakundek parte-hartzearekin. Horien artean Odon Elorzaren aginteko Udala zegoen, %37ko partaidetzarekin. Sozietate horretan asmo handiko proposamena egin zen: 174 etxebizitza eta local eraistea, Polizia Nazionalaren kuartela kentzea eta Compañía de Mariarentzat eraikin berria egitea.

 

Operazio horrek sozietatea hainbat erabaki hartzera behartzen zuen, betiere, kontuak atera zitezen. Eta sozietateak operazioari heldu ahal izango zion, baldin eta egiten ziren etxebizitza libre berriak 9.000 euro metro karratuko prezioan saltzen baziren, eta 100 milioi euroko mailekua hartzen bazen.

Inork ez zuen espero, ordea, 2008an munduko ekonomia kolokan jarri zuen krisi-egoera. Krisialdiak proiektuarentzat kolpe latza suposatu zuen. Izan ere, proiektuaren egikaritzea hasita zegoen eta hainbat familia etxetik kanpo zeuden eraisteak hasita baitzeuden. Krisi hau hurrengo udal gobernuak kudeatu behar izan zuen, hain zuzen ere, Juan Karlos Izagirreren aginteko udal gobernuak.

Egoera zailari irtenbideak

 

Sozietatea porrot egiteko arriskuan zegoen, izan ere, etxebizitzen salmenta geldi zegoen eta saltzen zirenak 5.000 euro metro karratuko saltzen ari baitziren (aurreikusitako 9.000 euro metro karratuko preziotik oso urriti). Horrek, egoerari aurre egiteko planteamendua egiteko beharra ekarri zuen, eta planteamenduan kontuak orekatu ahal izateko hiru elementu sartu ziren:

 

1. San Bartolomeren komentu zaharran hotela egitea.
2. Easo eta Estella-Lizarra kale kantoian zegoen Bainu-Etxe zaharran etxebizitza-eraikina egitea.
3. Muinoaren magalean merkataritza-gunea eta aparkalekua (egoiliarrentzat zein rotaziorako) egitea.

Erabaki hau 2014an hartu zen eta udal talde politikoetako bozeramaileok egoera ulertu genuen, udal gobernuari babesa helarazi genion eta Plan Orokorrak behar zuen aldaketa aho batez onartu genuen.

Azken urteetan, zuzendu dudan udal gobernuak ardura izan du erabaki hori aurrera eramateko. Egun, aipatutako hiru elementu horietatik bi eginda daude, eta merkataritza-gunea eta aparkalekua zen egiteke zegoen bakarra.

Erabakia

 

2014.urtean genituen egoera, balorazioak eta iritziak gaur oso bestelakoak dira. Azken hilabeteetan pertsona eta elkarte askorekin hitz egiteko aukera izan dut; aldeko zein kontrako iritzi asko entzun ditut, eta uste dut egun merkataritza-gunea edo rotazio parkina egiteko dagoen baloraioa oso bestelakoa dela, eta are gehiago, erdialdean sartzen diren ibilgailu pribatuen kopurua gutxitzeko hartzen ari garen erabakien kontra egiten duela.

Gainera, merkataritza-gunea eraikitzeko lanak auzotarrengan eragin zuzena izan behar zuen, eta dagoeneko eragin handiak izan dituzte Topoa bezalako proiektu garrantzitsuaren lanak direla eta. Hortaz, horrek guztiak eraman gaitu erabakia hartzera, hain zuzen ere, San Bartolome Muinoaren kontseiluari merkataritza-gunea eta aparkalekua eraikitzeko kontratua eteteko eskatzeko erabakia.

Orain, hausrnarketarako prozesua irekiko da, muinoaren magalarekin zer egin erabakitzeko. Izan ere, uste dut ezin duela dagoen egoeran gelditu. Eremuari irtenbide egokia eman behar zaio proiektu egoki batekin, eta hor guztion ekarpenak ezinbestekoak izango dira. Donostiak aurrera egiten duelako elkar hitz egiten, entzuten eta adosten dugunean.

Jarrai dezagun guztion artean Donostia elkar-bizitzeko, lan egiteko eta disfrutatzeko munduko hiri onena egiten.

Urrezko Danborra emateko ekitaldia San Sebastian eguneko une hunkigarrienetako bat da. Festaren erdian, eta 5.000 haur Erdialdeko kaleetan Haur Danborradan parte hartzen ari direla, donostiar askok asko espero dugun unea iristen da.

 

Donostiak zorte handia du bere hiritarren artean Urrezko Danborra bezalako sari hain maitatua emateko hainbeste hautagairen artean aukeratzeko. Izan ere, hemen talentu asko eta maila handia dago arlo ezberdinetan. Baita artistikoan ere. Aurten, Moriarti ekoiztetxe donostiarrak jaso du merezitako saria, izan ere Donostiatik lan handia egin du eta mundu osoan zehar aitortza izan du.

 

Moriarti urte askotan hiriko enbaxadore bikaina izan da eta hala izaten jarraitzen du. Une honetatik aurrera, sari hau ematen dizuen hiriak lan hori bera egiten jarraitzeko eskatzen dizue: hiriari buruz hitz egiten jarraitzea, zuen filmeetan erakusten jarraitzea, eta zergatik ez, noizbait hiria filme horietako protagonista bilakatzea.

 

Beraz, Urrezko Danborra harro eraman behar duzu. Harro baina zuen estiloan, hau da, apaltasunez, handinahikeriarik gabe, eta jakinda Urrezko Danborra jasotzeak hiriari betirako lotzen zaituztela.

 

Irakurri hitzaldi osoa hemen: Urrezko Danborra 2025

San Sebastian bezperan hiriaren urteko egunik garrantzitsuenaren atarian, Hiritar Merezimenduren Dominak emateko ekitaldia egiten dugu. Oso ekitaldi sentitua izaten da, Udalak, hiriak, bere alde lan egiten duen jendea eta elkarteak saritzen dituelako.

Aurtengo bost sarituak hauek izan dira: Asociación Mestiza, Banco de Alimentos, Contxu Uzkudun, Iñaki Almandoz eta Radio San Sebastián. Ondo egindako lanak, urtetako izerdiak eta empeñoak, sari hau jasotzera ekarri ditu.

Mila esker hiri osoaren izenean zuen lanagatik. Espero dut urte askotan horrela jarraitzea, izan ere, horrek esanahai bat du: Donostia bizirik jarraitzen duela eta donostiarrok zuen lanari esker hobeto bizi garela.

Irakurri hemen hitzaldia osorik: Merezimendu Dominak 2025

Bihar agur esango diogu 2024.urteari eta etzi ongietorria emango diogu 2025ari, hain zuzen ere, erronkaz eta aukerez betea dagoen urteari. Eta erronka eta aukera horiek aitzindiariak izango dira. Gaur, zuekin partekatu nahi ditut martxan ditugun lehentasunezko proiektuak eta elkarrekin aurre egingo diegun erronkak.

Martxan dauden proiektuak eta datozen urteetan hasiko direnen azterketa objektiboa egiten badugu, ikusiko dugu Donostia inbertsio handiak egiten ari dela eta herritarren erabilerarako oinarrizko azpiegituren berrikuntza sakoneko une batean dagoela. Hiri bat eraikitzen ari gara, hain zuzen ere:

– garraio publiko gehiago eta kutsadura gutxiago auto gutxiago dituen hiria.

– Donostiarren bizi-kaliteta nabarmen hobetzeko oinarrizko azpiegitura berrituak dituen hiria.

– kirol- eta kultura-instalazioen erreferentzialtasuna berreskuratzearen aldeko apustua egiten duena.

– adin guztietarako etxebizitza irisgarrien parkea handitzeko ahalegina egiten duena.

– kalitatezko enplegu iraunkorrak sortzeko proiektu traktorieak bultzatzen dituena, ahalik eta pertsona gehienentzako aukerak sortzearen aldeko apustua eginez.

2025.urtean, Topoaren igarobideko tunela induskatzen amaituko da eta orain arte eragozpenak jasan dituzten eremuak urbanizatuko ditugu. Obra horrek, gure hiriaren konektibitatea hobetzeaz gain, garraio jasangarria erraztuko du eta gure kaleetan pilaketa murriztuko du.

Illunbe erabilera anitzeko pabiloi bihurtzeko proiektuak aurrera egingo du eta proiektuaren ezaugarriak ezagutu ahal izango ditugu. Haizearen Orraziaren birgaitzeak lehentasuna izango du 2025ean, baita segidako proiektuek ere: Emisio Txikiko Eremua abian jartzea, 17. linean BEI proiektua hastea, Martuteneko espetxea Eskusaitzetara lekuz aldatzea eta Txominenea II abian jartzea, Ibaetan IBMren ordenagailu kuantikoa ezartzea, eta berrikuntza-zentro berriak irekitzea, hala nola Mubil Eskusaitzetan, GOe Grosen eta Ikerbasque Ibaetan.

Auzoetan ere hainbat proiektu garatzen hasiko dira, baita donostiarrentzako kalitatezko zerbitzu berriak ere, hala nola Udalinfoko bulego berria, hiru haurreskola berri, Villa Salia edo Erdialdeko zahar-etxea birmoldatzeko obrak. Eta horrekin batera, Illarra, Inpernua eta Añorga bezalako hirigintza-garapenetako obrak hasiko dira, hain zuzen ere, donostiarrentzat etxebizitza aukera berriak sortuko dituzten garapenak.

Proiektu horiek erakusten dute Donostia modernoagoa, sozialki kohesionatuagoa, jasangarriagoa eta abegikorragoa izateko dugun konpromisoa. Elkarrekin, erronka horiei aurre egingo diegu eta guztiontzako hiri hobea eraikiko dugu, hain zuzen ere, bizirik dagoen hiria, aukerak sortzeko eta talentua eta inbertsioak erakartzeko gaitasuna izango duen hiria.

Gure helburua eta nahia da gure seme-alabei jaso duguna baino hiri hobea uztea. 2030eko eta hurrengo hamarkadetako Donostia gaur egun eraikitzen ari da.

Kanpoko arazoak direla-eta, bereziki pandemiak eragindako ondorioak direla-eta, ezin izan dugu azken urteetan hurrengo ekitaldirako aurrekontua urtea amaitu aurretik onartu. Aurten, beraz, esan dezakegu, normaltasunera itzuli garela.

 

Baina, nola azaldu dezakegu Udal aurrekontua zenbaki handietan galdu gabe? Bideo honetan saiatu gara aurrekontuaren ildo nagusienak minutu batean laburbiltzen:

Ikusi duzuen moduan, aurrekontuari esker gehien behar dutenei lagundu diezaiekegu, autobus elektriko berriak kaleetan zirkulatzen ikusi ditzakegu, kaleak zainduak eta garbiak izan ditzakegu, parkeak eta lorategiak zainduak, kiroldegiak eta kultur etxeak funtzionatzen, edo udaltzainak eta suhiltzaileak zerbitzu ematen Donostia hiri segurua izateko.

 

Era berean, behar diren baliabideak ematen dizkigu proiektu berriak garatzeko, hain zuzen ere, hiria zein auzoetako – eta bereziki gehien behar duten auzoetako –  bizi kalitatea hobetzeko proiektu berriak.

 

Eta besteak beste, proiektu horiek honakoa bilatzen dute: etxebizitza berria sortzea – donostiarrek duten behar eta kezka nagusienetako bati, etxebizitza beharrari, erantzuteko -, Anoetako miniestadioa edo Haizearen Orrazia birmoldatzea, Bretxako Arraindegia eraikinaren obrak amaitzea, edo hirian hiru Haurreskola berri jartzea. Hementxe dituzue garatuko diren hainbat proiektu:

 

 

Guztira, Udalak 517,4 milioi euroko aurrekontua kudeatuko du, eta horri esker segidako helburuak betetzen saiatuko gara:

 

1- Inor atzean ez uztea: Gizarte Ekintzako departamentuak 37,4 milioi euroko aurrekontua kudeatuko du;

 

2- Mugikortasun jasangarria sustatzea: 71 milioi euro bideratuko dira garraio publikoa bultzatzeko autobus elektrikoak erosiz eta tarifen beherapenak mantenduz;

 

3- Hiri zaindua eta kalitatezko zerbitzuak izaten jarraitzea: Hiri-Mantentze eta Zerbitzuetako departamentuak 105,4 milioi euroko aurrekontua kudeatuko du, eta hainbat zerbitzutan langile berriak kontratatuko dira;

 

4- Hiri segurua izatea: Udaltzaingoaren eta Suhiltzaileen aurrekontua %5,8 eta %6,6 handituko dira, hiritarrei zerbitzua emateko erabiltzen duten materiala berrituz eta euren instalazioetako ekipamenduak hobetuz.

 

Donostia hiri bizia da, eraldaketa etengabean dagoena eta erritmo onean aurrera egiten jarraitzen duen hiria da. Hiri kohesionatua, aberastasuna sortzen duena eta hiritarrei bizi kalitatea eskaintzen diena euren bizitza proiektuak hirian egiten jarraitzeko, eta beti, behar gehien dutenei lagunduz.

 

Espero dut aurrekontu proiektu berri hau modu erraz eta ulergarrian azaldu izana. Aurrekontu honi esker Udalak behar dituen tresnak izango ditu harro sentiarazten gaituen hiria izaten jarraitzeko.

 

Informazio gehiago

Politika Orokorreko urteko adierazpena egin dugu gaur. Bertan, luze eta zabal hitz egin eta eztabaidatu dugu hiriaren egoerari buruz. Nire hitzaldian zehar eduki dudan asmoa ez da izan “idilikoa” den Hiria irudikatzea, guztiok kezkatzen gaituzten gai nagusiei ekitea baizik. Eta horretarako, duela gutxi ezagutu genuen pertzepzio inkestaren emaitzaz baliatu naiz, izan ere bertan adierazten diren kezkak hurrengo urteetarako ditugun erronkak direlako.

 

Hiru dira une honetan hiritarrek adierazten dituzten kezka eta erronka nagusienak: Etxebizitza, Segurtasuna eta Turismoa. Horiek eta beste hainbat kontuan hartuta, 2030.urtera begira eraiki behar dugun Donostiaz hitz egin dut. Uste dut, gai horiekin batera, 2030.urtera begira eraiki nahi dugun Donostiak ezagutza eta zientziaren aldeko apustua egiten, Mugikortasun eredu berria sustatzen, eta hiri kohesionatu, abegikor eta inor atzean uzten ez duen politiken aldeko apustua egiten jarraitu behar duela.

 

Eta kohesio hori bermatzeko, ezinbestekoa da, Gizarte Zerbitzuak indartzen jarraitzea. Eta bide horretan gure konpromisoa irmoa da, eta datuek hala erakusten dute. 2023An 172,19 euro bideratu genituen hiritar bakoitzeko. Eta gizarte zerbitzuen karterak ezarritakoarekin betetzen jarraitzen dugu, eta hori ezin dute esan Gipuzkoako udalerri gehienek.

Etxebizitzak Donostiarren kezka nagusienetakoa izaten jarraitu du. Gure lehentasuna izan behar du mota ezberdinetako eskaintza sustatzen jarraitzea eta bereziki babestutako etxebizitza egiten jarraitzea. Eta horretarako, ezinbestekoa dugu Eusko Jaurlaritzarekin elkarlanean aritzea. Eusko Jaurlaritzak dagoeneko eskua zabaldu digu eta prest gaude elkarlanean aritzeko hirian eskaintza berria sortzeko, eta hiritarrek duten kezka nagusi horri erantzunak emateko.

 

Segurtasunaren gaineko kezka asko nabarmendu da hiritarren artean azken urteetan. Arazoa ez da neurririk ez dela hartzen. Ertzaintzak eta Udaltzaingoak bere lana egiten ari dira, baina hiritaren artean inpunitate sentsazioa da nagusi, eta hori arazoa bihurtu da. Gure jarrera irmoa izaten jarraituko du delituen aurka, baina ezinbestekoa da ondorengo kateak ondo funtzionatzea, inpunitate sentsazio horrekin amaitu ahal izateko.

 

Turismoa da hiritarrek adierazten diguten hirugarren erronka. Azken urteetan turismoari buruzko kudeaketa eredua aldatu da. Erakartzea sustatzetik kudeaketa eta zaintza sustatzera pasa gara. Eta gainera, urteak daramatzagu jarduera arautzeko neurriak hartzen, eta hiriaren turismo estrategia hiriaren garapenari lotzen, eta beti, donostiarrak lehenetsiz.

Aldaketa klimatikoak asko kezkatzen gaituen gaia da, eta horretarako hiri bezala apustu sendoa egiten ari gara energia berriztagarrien alde, baita benetako garraio publiko jasangarri baten alde, non eta trena eta autobus elektrikoen bidezko zerbitzuek ardatz izango diren. Gainera, Ixuri Gutxiko Eremua aurrerapena izango da aldaketa klimatikoaren erronkari hiri bezala aurre egin ahal izateko.

 

2016an elkar bizitzeko kultura leloa erabili genuen balioen hiria, Giza Eskubideen eta demokraziaren aldarrikapena egiteko. Mezu ezkor eta nostalgikoak ari dira gailentzen. Eta horiei aurre egiteko komunitate sentimenduaren defentsa egitea ezinbestekoa da.

 

Hirian hizpide diren gai nagusienak aukeratu ditut aurtengo Politika Orokorreko adierazpena egiteko. Gure atentzioa eta ekintza merezi dituzten gaiak dira. Eta horiei heltzeko, gure borondatzea da elkarlanean aritzea, betiere, hiri hobeagoa egiteko.

 

2024.urteko Politika Orokorreko adierazpena