Astelehenean zabalduko ditu ateak Parte Zaharrak hainbeste behar eta merezi zuen osasun zentroak; berria eta modernoa. XX.mendearen hasieran Arraindegiaren eraikina zen, hain zuzen ere, arraina saltzen zen merkatua. Bretxako merkatuaren eraikinetako bat zen. Erabilera komertzialarekin sortu zen.
Ondoren, gertuago, beste erabilera batzuk ere ezagutu ditu. Denok gogoan dugu bere azken erabilera: zinema batzuk zeuden hemen, jatetxeak, tabernak, dendak…. Beste erabilera komertziala, beraz.
Orain, eraikin honen bi heren erabilera publikorako berreskuratu ditugu: batetik, kirol instalazio bat. Eta, bestetik, osasun publikoaren lehen mailako harreta eskainiko duen gunea. Donostiak aspaldi espero zuen osasun azpiegitura da. Behar beharrezkoa.
Alde Zaharrari eta Erdialdeko donostiarrei zerbitzua emango dien osasun etxe berria, ondo hornitua eta profesional ezin hobeekin.
Osasun zentro honek lehen mailako arreta emango die 16 mila biztanleri. Eta ziur naiz hemen jardungo duten profesionalek euren jakintza eta ahalegina egingo dutela arreta hori lehen mailakoa izan dadin.
Osakidetza apustu garbia egiten ari da Donostialdean dituen zerbitzuak eta azpiegiturak hobetzeko.
2021ean Aieteko osasun-zentroa ireki zuen. Astelehenean Parte Zaharrekoa irekiko da. Eta etorkizun hurbilean Txomineneakoa irekitzeko elkarlanean ari gara dagoeneko.
Gainera, hurrengo urteetan hainbat inbertsio garrantzitsu egingo dira Donostia Ospitalean, bai lehen arretan, baita protonterapia tratamendua hartzeko azpiegitura berria. Horri guztiari esker Donostialdeako ESIak jauzi kualitatiboa emango du eskaintzen dituen zerbitzuetan, izan ere, arretaren kalitatea hobetuko da.
Hori guztia dela-eta, Eusko Jaurlaritzari eta Osakidetzari eskerrak eman nahi dizkiet gure hirian osasun sistema publikoa indartzeko egiten ari diren apustuagatik.
Eraikinaren bi heren erabilera publikora bideratuta egongo dira. Alde batetik, Udalaren kirol instalazioa; bestetik, osasun zentro berri eta modernoa, hain zuzen ere, hiriaren bihotzean zerbitzu emango duen zentroa.
Nahiz eta baztuek modu maltzurrean pribatizazioari buruz hitz egiten duten, hemen dago errealitatea: inbertsio publikoa, zerbitzu publiko bat emateko, hain zuzen ere, pertsonentzako zerbitzu publiko bat, donostiarrentzako zerbitzu publiko bat.
2024ko Donostiako Udalaren aurrekontu-proiektua aurkeztu dugu gaur. Guztira 483,6 milioi euroko aurrekontu kontsolidatua izango dugu, iaz baino %4,68 handiagoa. Eta helburua argia da: donostiarren bizi kalitatea hobetzea auzoetan jarduketa berriekin; gehien behar duten pertsonei laguntzea; eta hiriko ingurumena eta iraunkortasuna hobetzea.
Aurrera egiten duen hiriarentzat diseinatutako aurrekontua da, hurrengo hogei urtetara begiratzen duen aurrekontua. Hurrengo belaunaldiei hiri hobea utzi nahi badiegu orain hartu behar ditugu hainbat erabaki: etxebizitza gehiago egiteko pausoak eman, lan egiteko aukerak sortu, ingurumena zaintzeko ekimenak egin, gizarte-kohesionatua izateko neurriak hartu edota erakargarritasuna duen hiria izaten jarraitzeko jarduketak burutu.
Gastu arrunta nabarmen handitu da, besteak beste, pertsonal gastuari bideratutako aurekontu sailen handitzea dela-eta, eskaintzen diren udal zerbitzuen kostuaren igoera dela-eta, eta zor publikoaren handitzea dela-eta Euriborraren igoera eta Loiolako Kuartelak erosteko sinatuko den maileguak sortuko dituen interesen ordainketagatik.
Udalak gastu korrontearen handitzeari aurre egiteko gai izango da Udalak Finantziatzeko Foru Funtsaren ekarpena iaz baino %7,05 handiagoa izango delako eta zerga-politikaren eguneraketaren ondorioz diru-sarrera arruntak handitu egingo direlako.
Helburua da, eskaintzen diren kalitatezko zerbitzuak ematen jarraitzea.
Gizarte gastua
Aurrekontu proiektua diseinatuta dago gehien behar duten pertsonei laguntzen jarraitzeko. Eta horretarako Gizarte Ekintza departamentuak 36,3 milioi euroko aurrekontua izango du, iaz baino %8,5 handiagoa, eta historian izan duen handiena. Horri esker, Gizarte Larrialdietarako Laguntzak handitu ahal izango dira (%14,7), baita Lan Partekatuaren Planaren Lagunak eta elikadurara bideratzen direnak ere (%9,3).
Mugikortasun jasangarriaren aldeko apustu sendoa
Aurrekontuaren beste ezaugarri nagusienetako bat da Udalatik egiten ari garen mugikortasun jasangarriaren aldeko apustu sendoa berresten duela. Dbus-ek Udaletik jasotzen duen diru ekarpenari esker autobus elektriko gehiago erosteko eta kotxetegiak elektrifikatzeko pauso sendoak egingo ditu.
Era berean, mugikortasun bertikalean inbertsio berriak egin ahal izango dira, besteak beste, Heriz inguruko igogailua, eta Erregina Erregente ingurua berrantolatu eta Zurriola Zubiaren egokituko dira oinezkoen eta bizikleten aldeko apustua sendotuz. Izan ere, Bulebarreko eta Zurriolako bidegorrien arteko lotura hobetuko da.
Inbertsioak
Udalaren finantza-egoera ona da. Horri eta Europako Batasunatik etorriko diren funtsei esker, inbertsioak egiten jarraitzeko gaitasuna izaten jarraituko dugu. Guztira, aurrekontuak 100 sail baino gehiago ditu martxan dauden garapen urbanistikoekin jarraitzeko (10,8 milioi euro bideratuko dira), kirol eta kultura instalazioetan inbertsio berriak egiteko (besteak beste Herrera eta Añorgako futbol zelaiak), eta hiriko auzoetan dauden hainbat behar eta proiektu gauzatu ahal izateko.
Su-Itzalketa, Prebentzio eta Salbamendu zerbitzuak ere makina berriak, instalazioak eta tresneria berritzeko aurrekontu-sailak izango ditu, baita 3 kamioi eta 4X4 ibilgailu bat erosteko ere. Eta gainera suhiltzaile gidari izateko 3 plaza eta komunikazioen operadore izateko plaza bat sortuko dira. Udal langile berri horiek sortuko diren 16 lanpostu berrien artean daude.
Inbertsioen artean Igeldo eta Ekialdeko Barrutiari bideratutakoek tarte berezia merezi dute. Izan ere, Igeldo Entitate Txikia izateko prozesuak aurrera jarraitzen duen bitartean – espero dugu urte amaierarako Tokiko Entitate Txikia Eratuta egotea -, Entitatearentzat behin behineko lokala egokitzeko edo Igeldoko eskola zaharra berritzeko prozesua hasteko hainbat inbertsio egingo ditugu.
Ekitaldeko Barrutian ere, 2024 eta 2025eko aurrekontuak osatzeko parte hartze prozesuan erabakitako hainbat proiektu gauzatuko ditugu aurten, eta Barrutiaren Batzarrak ia 360.000 euro kudeatuko ditu adostutako beste hainbat proiektu egiteko. Horiez gain, Udalatik Barrutiaren lokala egokitzeko lanak martxan jarriko ditugu, Altzako hiri-berroneratzearkin jarraituko dugu, eta besteak beste, Sorleku Parkearen poriektua garatzeko eta Nao Etxea berritzeko aurrekontu sailak aurreikusi ditugu.
Hiriko gainerako auzoetan aurreikusitako inbertsioez gain, beste 1,5 milioi euro bideratuko ditugu 2024ko eta 2025eko aurrekontuak osatzeko Parte hartze prozesuan erabakitako hainbat proiektu garatzen hasteko.
Donostia aurrera egiten duen hiria da, guztion ekarpenei esker. Gaur hasiera eman diogu aurrekontua onartzeko prozesuari, eta martxoan emango diogu hasierako onarpena. Guztiokin hitz egiteko prest gaude hiriak aurrera egiten jarrai dezan akordioak lortu eta hiriarentzat onak izango diren proiektuak gauzatzeko.
Beste urtebetez San Sebastian egun borobila ospatu dugu. Donostiarrok kalera irten gara, eta gure danbor eta upelekin Sarriegiren doinuak interpretatu ditugu hiriaren egunik handienean.
San Sebastian eguna urtarrilaren 20ko 24 orduak baino askoz gehiago da. Prestaketak, ensaioak, aspaldiko lagunekin topaketak…, horiek guztiek ere egiten dute San Sebastian eguna oso berezia. Baita bezperan zein egunean bertan Udaletxean egiten ditugun ekitaldiek ere.
Hiritar Merezimenduaren dominak
San Sebastian bezperan, jaiari hasiera eman aurretik, dagoeneko izaten dugu zer ospatu. Gure hiriaren alde lan egiten duten hainbat pertsonari eta erakunderi merezitako aitortza egiten diegu eta Hiritar Merezimenduaren domina ematen diegu.
Aurten, ADSIS Fundazioa, ATECE, Bizikletan Adinik Ez, Angel Rueda Aramaio eta Mentxu Medel izan dira sarituak. Haiei guztiei esker, gure hiria hobea da.
Lehen aitortza eginda, jaiari hasiera emateko unea iristen da. Urtero bezala, emozio handiko unea izaten da. Konstituzio plaza lepo ikusteak eta jendearen poza eta algara sentitzeak oilo ipurdia jartzen dit. Zalantzarik gabe, urteko une garrantzitsuena da. Aurtengoan 25 urte bete dira lehen aldiz emakumeek eta gainerako auzoetako danborradetako ordezkariek Konstituzio plazako oholtzara igo zirenetik. Hori ospatzeko aukera ere izan dugu.
Aurten Marugamen oparitutako zapia eraman dut bandera igotzeko unean. Senidetutako hirian Txakoli eguna egiten dute apirilaren 9an bi hirien arteko anaitzearen urtemuga ospatzeko. Urrian bisitan egon ginean zapia oparitu zidaten eta agindu nien bandera igoeran jarriko nuela.
Eta jarraian danborradako jantzia hartu eta Lurgorrirekin parte zaharretik kaleak alaitu ditugu, urtero moduan. Plazerra da hainbeste lagunekin une horiek partekatzea.
Haur danborrada eta Urrezko danborra
Goizean goizetik ibili gara kalean. Lehenik eta behin Antiguan, Edurne Sansinenea, alderdikide eta lagunari Jakintzak egin dion omenaldian. Jarraian Udaletxera joan gara egunaren beste mugarrietako bat bizitzeko: Haur Danborradaren irteera. Urtero Alderdiederren 48 konpainiek uzten diguten irudia zoragarria da, eta aurten ere horrela izan da. Danborradaren harrobia eta biziraupena bermatuta dago!
Behin Haurren Danborrada martxan, egunaren bigarren ekitaldi instituzional esanguratsuena bizi izan dugu: Urrezko danborra emateko ekitaldia. Oso ekitaldi hunkigarria izan da aurtengoa. Emozio handikoa. Isabel Verdinik jaso du eta bertan bere taldearen lanarekin gozatzeko aukera izan dugu. Gureak egiten ditugun balioak ordezkatzen ditu Isabelek. Eredu da, bai Donostian, baita mundo osoan ere. Horregatik jaso du hiriak hainbeste maite duen Urrezko Danborra.
Eta arratsaldean danborradaz danborrada ibili gara. Ez dago auzorik danborradarik gabe, eta horri esker urtero gero eta donostiar gehiagok parte hartzen dute gutxienez danborrada batean. Aurten 160 izan dira hiriko kaleak alaitu dituzten danborradak. Eta horietatik 155 mistoak dira. Berdintasunean aurrera pausoak egiten jarraitzen duen jaia da, eta horri esker gero eta parte hartzaile gehiago eta danborrada berri gehiago daude.
Poz handia sortzen dit lagunak euren danborradetan ikusteak, eta horregatik, eguneko ekitaldiek uzten dizkiguten une libreak familiarekin lagunen danborradak ikusten pasatzen ditut. Eta aurte ere, horrela izan da, Arriadaren unea iritsi arte.
Arriada
Sentimendu kontrajarriak izaten ditut, donostiar guztiak bezala Arriada egiteko unea iristen denean. Ekitaldi oso donostiarra da. Jaiotzen garenetik entzuten ditugun doinuak euren danbor eta upelekin jotzen dituzte Union Artesanako lagunek. Plaza dantzan jartzen dute, eta berez, tristea izan beharko lukeen unea – jaia amaitzen delako – gozamenerako unea bihurtzen dute. Hunkigarria da azken San Sebastian martxa plazak abestuta entzutea, baita Txuri Urdina, Ikusi mendizaleak edo Ixil Ixilik dago abestien doinuak ere.
Eskerrik asko Ikasbide Kultur Elkarteari bere zapia emateagatik aurtengo Arriadan jartzeko. Bertako ikasle ohi bezala ohorea izan da zapia jartzea une hain hunkigarri honetan zuen 25.urteurrena ospatzeko. Zorionak!
Bandera balkoitik kendu dugu, eta aurten larunbata izanik jaia piskat luzatu dugu. Orain beste hainbat jai etorriko zaizkigu, besteak beste, Kaldereroak, Inudeak eta Artzainak, Santa Ageda eta Inauteriak. Irrikaz gaude horiek ere iristeko. Bitartean bizitakoarekin gozatzen jarraituko dugu.
Zalantzarik gabe, ez dago donostiar izateaz baino gauza handiagorik. Eskerrik asko donostiar guztiei egun paregabe honengatik. Gora Donostia!
2024ko urtarrilaren 10ean, 100 urte bete dira Eduardo Chillida Juantegui Donostian jaio zela.
Oso pertsona gutxi izango da gure hiriaren historian berak utzi zigun aztarnaren pareko utzi duenik. Artista asko izan ditugu, eta ditugu Donostian, zorionez. Jenioak, oso gutxi.
Ikustezina den zubi batetik igaro behar da artista izatetik, jenioaren mailara iristeko. Horrengatik da hain zaila jauzi hori egitea. Zubi hori, ikustezina delako. Erreza balitz, jenio asko izango genuke inguruan. Baina jenioak, gutxi daude munduan.
Eduardo Chillidak sormenaren bi ibarrak batzen dituen zubi ikustezin hori zeharkatu zuen: artisten eta jenioen aldeak banatu edo batzen dituena. Alde honetan obra artistikoak sortzeko gaitasuna duten pertsona asko bizi dira. Batzuk ez dira onak, beste batzuk ordea onak edo oso onak dira.
Zubia ikustezinaren beste aldera, hau da, jeinuen aldera, iristea oso zaila da. Gutxi batzuek bakarrik lortzen dute. Eta horiek herrien eta pertsonen historian marka ezabaezina uzteko gai dira. Bere sormen gaitasuna beste dimentsio batera pastzen diren obrekin loratzen da.
Eduardok zubi ikusezin hori zeharkatu zuen, donostiar eta gipuzkoar on gisa, pixkanaka, isilik, zaratarik egin gabe.
Konturatu orduko, mutil hura, ilea nahasirik, zubiaren beste aldean zegoen, arte mundialaren gainerako maisu handiekin batera.
Harrotu gabe, ahotsa altxatu gabe, zirikatu gabe.
Bere barrutik sortzen ziren mirari artistikoak sortuz, zizelatuz, kolpez kolpe.
Bere ibilbidea gurea da, euskalduna, bertakoa. Baina, aldi berean, guztiona da, unibertsala.
Donostiako nire ibilbide geografiko eta bitalean, nola ez, Haizearen Orrazia dago. Leku horretan, Eduardok zerbait sublimea lortu zuen. Lehen arrokak eta itsasoa zeuden lekuan, eremu berri bat sortu zuen. Gure barnera sartzea lortu zuen, eta betirako finkatzea.
Eduardorengandik zerbait miresten badut, bere estetika eta materialei ematen zizkien formak baino gehiago, espazioak dira.
Eskulturak hutsean dimentsio berri bat zuela ikusi zuen. Beste batzuek zerbait osagarri eta zirkunstantziala ikusten zuten tokian, berak esentzia ikusten jakin zuen.
Forma eta bizia eman zion hutsari, espazioari. Zentzu bat eman zion, ukigarri, atzemangarri, ozen, fisiko eta metafisiko bihurtu zuen.
Uste dut ekarpen hori oso gutxiren esku dagoela.
Donostiaren historian bada mugarri bat. Eduardoren aurretik, eta Eduardoren ondoren.
Duela ehun urte gure hiriak ez zuen Chillidaren lanen bidez ezagutzen eta adierazten. Gaur, ezin dugu imajinatu haiek gabe.
Urte berri baten hasieran ohi dugun bezala hurrengo hilabeteetarako ditugun erronkak aipatu ditugu, hain zuzen ere, Donostia hiri hobea bihurtuko duten proiektu garrantzitsuenak.
Aspalditik martxan dauden proiektu asko azken fasean sartuko dira edo amaitzen joango dira; eta, hasiko diren beste proiektu asko amaitutakoan, gure hiriak itxura guztiz berritua eskainiko du.
Beraz, zalantzarik gabe, 2024a Donostiarentzako bultzadaren urtea izango da. Horretarako, lehen erronka, 2024ko aurrekontua onartzea izango da; proiektu asko gauzatzen ahalbidetuko duen aurrekontua. Urtarrilaren amaieran Udal gobernuaren proposamena aurkezteko moduan egongo gara, eta dagoeneko aurreratu dezakegu, %4 handiagoa izango dela, inflazioari aurre egiteko eta Udalaren historiaren finantza-kreditu eragiketa handienari, hau da, Loiolako kuartelak erosteko eragiketari aurre egiteko.
Garapen berriak eta proiektuen amaiera
Loiolako Kuartelen eremua diseinatzeko prozesua hasteaz gain, hiria pixkanaka berrantolaketa urbanistikoan aurreratzen joango da: Lorategi Hiriko urbanizazioa; Infernua, Igara eta Illarrako eremu berriak garatzeko obren hasiera; Martuteneko espetxearen leku-aldaketa…
Horrekin guztiarekin batera, Hiri Antolamenduko Plan Orokorraren Aurrerapena onartuko da eta plana idazten hasiko da. Ildo beretik, ostatu-erabilerei buruzko egungo Plan Orokorraren aldaketari hasierako onarpena ematea ere aurreikusten da, hotel berrien lizentzien etenaldia beste urte batez luzatzeko”.
Era berean, beste hainbat proiektu zehatz garatuko dira, besteak beste segidakoak: Antso Jakitunaren alde bikoitiaren espaloia urbanizatzea; Bidebietako parkea berritzea; Anoeta ingurua urbanizatzeko lehen fasea; Martuteneko biribilgunea egiten hastea; San Martin eta Bretxa merkatuak berritzea; ZM berria; eta Kontxako barandaren berritzkeo azken fasea.
Etorkizuneko mugikortasuna
Hiriko Mugikortasun Plana onartu ondoren, etorkizuneko mugikortasunerantz urratsak ematen jarraituko dugu. Gure helburua argia da: oinez edo bizikletaz joatea bezalako modu aktiboak sustatzea, garraio publikoa bultzatzea eta hori guztia erraztuko duten hiri-inguruneak sortzea.
Dbusen flota berritzeko lanean jarraituko dugu, eta Monseko kotxetegiak elektrifikatzen hasiko dira. Eta bizikleta bidezko mugikortasuna bultzatzeko, hiriko bizikleta-sarea hobetzeko lanean jarraituko dugu, eta amaituta ikusiko ditugu Bidebieta eta Trintxerpe lotzen dituen bidegorri-zati estrategikoak edo Boulevard, Erregina Erregeordearen eta Zurriolako zubiaren arteko zatirako proiektua.
Topoaren lanek ere aurrera jarraituko dute. Egungo bi tunelak laster egongo dira lotuta, eta beraz, inguruaren berrurbanizatzeko lanak hasiko dira, hala nola, Easo eta Xabier Zubiri kaleetan.
Eta hiri gero eta iraunkorrago baterantz aurrera egiteko Isuri Gutxiko Eremuarem proiektua garatzen jarraituko dugu. Aurreikuspenen arabera, urtearen amaieran ezarriko da, datozen hilabeteetan aplikazio-esparrua adosteko egingo den partaidetza-prozesuaren ondoren.
Kultura eta Kirola
2024an ere kultura eta kirol ekitaldi garrantzitsuak izango ditugu hirian. Horien artean, Eduardo Chillida jaio zenetik mendeurrena beteko da, eta urteko erreferentzia kulturaletako bat izatea nahi dugu. Horretarako, Haizearen Orraziaren mendi-magala birmoldatzeko lanei ekitea dugu helburu, Kostaldeetako Zuzendaritzak baimena ematen digunean.
Kirol arloan ere helburu handiak ditugu. Horietako bat, eta garrantzitsuena esango nuke, gainerako erakundeekin akordioa lortzea Illunbe eraberritzeko eta erabilera anitzeko pabilioian bihurtzeko. Baina, akordioa lortu bitartean, ez gara geldi egongo, eta gure esku dagoen guztia egingo dugu gainerako kirol-instalazioak berritzeko pausoak emateko, besteak beste, miniestadioa, belodromoa edo Anoetako Estadioaren ikusle kopupurua handitzeko lanak.
Ezagutzaren hiria
Donostia Zientza eta Ezagutzaren hiria da, eta argi gelditu da azken urteetan garatutako hainbat proiekturi esker. Hori sendotzen jarraitzeko helburua dugu, eta horretarako, lanean jarraituko dugu 2024an ere, Miramongo Parke Teknologikoa handitzeko, edo martxan dauden hainbat eraikinen lanak bultzatzeko: ordenagailu kuantikoaren egoitzaren eraikina, Donostia International Physics Center-en egoitza berria, edo MUBILek Eskusaitzetan duen egoitza.
Donostiar guztien bizi-kalitatea hobetzea helburu
Gure helburu nagusiena donostiar guztien bizi-kalitatea hobetzea da. Villa Salia edo Abegi Etxea berritzeko lanak garatuko dira hasi berri den urte honetan. Eta era berean, donostiarrekin komunikazioa errazteko Donostia Eskura APP berria aurkeztuko dugu, hain zuzen ere, hiritarrei udal administrazioarekin kudeaketa eta izapideak modu eroso, azkar, eta errazago batean egitea ahalbidetuko duen APP berria.
Eta Udalak berak bultzatutako proiektuez gain, beste eragile eta erakunde batzuek martxan jarritako beste proiektu handi batzuek ere indartuko dute hiria 2024an. Horien artean, Donostia Ospitaleko Osasun Hirian egingo diren hobekuntzak (aparkaleku berria, Protonterapia eraikina eta Kanpoko kontsulten eraikina), Bretxan dagoen Erdigunea-Alde Zaharra Osasun Zentro berria, edo Basque Culinary Centerren GOe eraikina eraikitzeko lanak.
Urte luzea dugu aurretik, eta proiektu asko esku artean. Atsedenik gabe horiei guztiei heltzeko unea da. Eta bide hori hiritarren eskutik egin nahi dugu. Jarrai dezagun guztion artean Donostia hobea egiten.
Espainiako Gobernuaren Ministroen Kontseiluak Donostiako Udalari Loiolako Kuartelen lursailen eskualdaketa onartu du gaur, zalantzarik gabe albiste ezinhobea.
Gaur hirian izan duen helburu historiko bat lortzeko prozesu luze baten amaiera da, hain zuzen ere, etorkizuneko hiria garatzen jarraitzea ahalbidetuko duen prozesua luzearen amaiera. Izan ere, Udal korporazio askok lan egin dute helburu hau lortzeko, eta benetan pozgarria da ikustea prozesu luze hau ondo amaitu dela eta etorkizuneko hiria diseinatzeko ateak irekitzen zaizkigula.
Orain hiriaren parte izango den eremu hori diseinatzeari ekingo diogu, eta diseinu horrek ikuspegi zabala izango du, izan ere, hiriak izango duen eremu garrantzitsuenetako bat izango da. Eremu horri esker hiriak Urumea eta Intxaurrondo arteko ardatz berria izango du, eta horrek aukera handiak emango dizkigu, bai etxebizitza berriak egiteko, baita hiri-ekipamendu berriak egiteko ere.
Talde lanaren emaitza
2021rako Estatuko Aurrekontu Orokorren negoziaketaren barruan Estatuko gobernuak EAJ-PNVrekin adostutakoa bete da gaur. Kongresuko Euskal Taldearen bozeramaile Aitor Estebanek eta talde osoak egindako lan handiari esker, eta hainbat eragileren oztopoak oztopo, gaur eremu hori hiriarentzat berreskuratu dugula harrotasunez esan dezakegu.
Negoziaketan parte hartu duten pertsona guztiei esker ona adierazteko unea da. Izan ere, lortutako akordioari esker, kuartelen eremuan 1500tik 1700ra etxebizitza berri eraikitzeko, beta hiriarentzat izango diren bestelako ekipamendu eta berdegune berriak egiteko aukera izango dugu.
Zalantzarik gabe, talde lanaren emaitza da, hain zuzen ere, hiriarentzat onurak dakarren talde lana.
