Ezin dizuet ukatu, gaur ez da gau ona izan guretzat, baina Donostian irabazi dugu! Eta hori esan beharra dago.
Horregatik, gaur lehenik eta behin donostiarrei eskerrak eman nahi dizkiet emandako konfiantzagatik. Ulertzen dut bidalitako mezua, eta horren arabera hurrengo lau urteetan lanean jarraituko dugu. Hiritarren zerbitzura gaude. EAJ-PNV hori da eta hori izaten jarraituko du.
Eskerrik asko lan talde guztiari, boluntario guztiei. Dena eman duzue, guzti guztiok. Lan-talde paregabea dut eta hala sentitzen dudalako esaten dut.
Eta bereziki eskerrak eman nahi dizkiet nire familiari, seme-alabei eta emazteari. Baita, gurasoei ere, berezirik amari: gaur ez zaude hemen, baina zauden tokian zaudela badakit gaur hemen gurekin zaudela.
Aurrera Batera. Jarrai dezagun Donostia elkarrekin etorkizunerantz eramaten.
Azken txanpan gaude, hauteskunde kanpaina ixtear. Munduko lan-talde onena dugu, munduko hiririk onenean. Nahiz eta batzuek txuribeltzezko hiria dela sinestarazi nahi diguten, ez da horrela. Donostia hiri ederra da, baikaina, etorkizun oparoa duen hiria.
Igandean asko dugu jokoan: aukerak eskaintzen dituen hiri oparoa izaten jarraitzea, edo txuribeltzezko hiria izatera itzultzea. Horregatik, inoiz baino garrantzitsuagoa da bozkatzera joatea.
Hauteskunde kanpaina bizia izan da, eta bertan, ilusio eta gogo handiz, gure egitasmoa aurkeztu diegu donostiarrei eta euren proposamenak eta iradokizunak jaso ditugu.
Donostiak aurrera egiten jarraitu behar du. Ilusio handiko etorkizuna duen hiri oparoa izaten jarraitu behar du. Eta hori donostiarren eskutik egingo dugu, Donostia Europako hiririk onena izan dadin; bizitzeko, lan egiteko eta elkarrekin gozatzeko.
Horregatik, oso garrantzitsua da igandean bozkatzera joatea. Izan ere, ez bozkatzean ere hautua egiten da, akaso nahi ez den hautua. Eta ondoren ez du balio damutzeak, baldin eta gustuko ez dena atera bada.
Hiriak aurrera egiten jarraitzea nahi baduzu, etorkizun oparoa izango duen hiria nahi baduzu, bozkatzera joan eta EAJ-PNVren hautua egin ezazu. Izan ere, EAJ-PNV da hiri eta lurralde honen motorea.
Beraz, datorren igandean, astindu nekeak, perezak, irten kalera eta bozkatzera.
“Donostiarekin kontratua” sinatu dut gaur goizean Iñigo Urkullu Lehendakariaren, hautagaitzako kideen eta kanpainako boluntarioen aurrean, eta bertan, bost konpromiso hartu ditut, hain zuzen ere, donostiarren eta auzoen bizi kalitatea hobetzeko sustatuko dituen bost konpromiso.
Horrenbestez, hurrengo lau urteetarako bere aginteko udal gobernuaren eginkizunaren ardatzak ezarri ditugu, hain zuzen ere, pertsonak erdigunean jarriko dituen kudeaketa, etxebizitza eta nortasuna, aniztasuna eta parte hartzea, eta aurrerapenaren kudeaketa eta jasotako legatuaren babesa.
Aurretik ilusio handiko lau urte ditugu, eta epe horretan hiriaren etorkizuna erabakiko da. Horregatik, igandean bi aukeren artean aukeratu behar da: alde batetik, hiri oparo, tolerante, abegitsu bat lortzeko aurrerapausoak ematen jarraitzea; edo bestetik, 2011ra atzera itzultzea, hau da, paralisira, endogamiara eta inposiziora. Hori da guztiok sinatu behar dugun kontratua.
Azken legealdian, bi urteko osasun-larrialdiaren ondoren, gai izan gara sortutako zailtasun eta ustekabeei aurre egiteko. Orain ekonomia-krisiaren eta ezegonkortasun geopolitikoaren ondorioei modu errealistan eta elkartasunez aurre egiten ari gatzaizkio. Eta zailtasunak zailtasun, Donostiak egunero aurrerapausoak ematen ditu, eta horregatik donostiarrekin kontratuaren berritzea aurkeztu dugu, hain zuzen ere, benetako konpromisoa, populismorik eta bete ezin diren promesik gabeko kontratua.
Hauek dira hartu ditugun bots konpromisoak:
1- Donostiarra eta gure auzoak zaintzea.
2- Kalitatezko enplegua sortzea.
3- Nortasun propioa duen hiri batean bizi eta gozatu ahal izatea.
4- Elkarrizketan oinarrituta lan egitea
5- Gure hiriaren aurrerabidea bermatzea eta jasotako ondarea defendatzea.
Aurretik hiriaren etorkizuna erabakitzeko ilusio handiko lau urte ditugu. Asko dago egiteko. Hainbat gai zuzendu behar ditugu, eta hainbat neurri eguneratu beharko dira. Eta horretarako zuen konfiantza eskatzen dizuet, elkarrekin Donostiak aurrera egiten jarraitzeko.
Kanpaina aurrera doa. Egun gutxi falta dira gure Hiriak erabaki dezan. Eta erabakia garrantzitsua da. Oso garrantzitsua.
8 urte eman ditugu gogor lanean gure Hiriak aurrera egin dezan. Gaur Donostia, etorkizunari beldurrik gabe begiratzen dion Hiria da. Oinarri sendoak dituena, eta horiek, guztion artean egin ditugu posible.
Dena gaizki dagoela ikustarazi nahi dutenen aurrean ozen eta argi esan beharra daukagu: harro egoteko moduko hiria dugu, eta horrela izaten jarraitu nahi dugu.
Datuek gezurtatzen dute ezkortasunean, kritikan eta populismoan murgilduta daudenek sinistarazi nahi digutena. Guk aurrera egiten jarraitzeko hautua egiten dugu. Eta horretarako ezinbestekoa da aitortzea ondo egindakoa, baita gaizki egindakoa ere. Izan ere, apaltasunez egindako aitortza hori aurrera egiteko eta hobetzeko lehen pausoa da.
Baina gaur utziko didazue aurrean daukaguna erretratatzen, donostiarrok argi izan behar dugulako zer dugun jokoan. Aurrean EH Bildu dugu, hain zuzen ere, proiektu guztien aurka dagoen EH Bildu. Horrek erakusten du Donostia oso gutxi maite dutela, eta ez dutela hiriak aurrera egitea nahi. Guztiari ez esaten diote. Ez, ez, ez, ez eta ez.
Bere goiburuak dio “Donostia berreskuratu” nahi dutela. Ez zaituztela engainatu. Ez dute “Donostia berreskuratu” nahi. Bakarrik beraientzako berreskuratu nahi dute. Beraien Donostia, ez guztiona.
Horregatik hauteskunde hauetan Bilduk aliatu bat du, abstentzioa. Hau da, Bilduk eta Abstentzioak koalizioan aurkezten dira hauteskundeetara. Eta zergatik egiten dute? Badakitelako zure botoak erabakitzeko gaitasuna duela. Horregatik, Bilduk ez du nahi zu bozkatzera joaterik. Etxean gelditzea nahi du. Bozka ematea erabakitzea da, baina ez ematea ere bada erabakitzea.
Beraz, gaurkoan dei bat egin nahi dizut, zure botoak duen indarra baliatzea Donostiak aurrera egin dezan. Eta horretarako konfiantza eskatzen dizut. Proiektua dugu, ilusioa eta gogo handiak ere. Eta zurekin, elkarlanean, Donostia aurrera egiten jarraitu nahi dugu.
Udalan gehien jasotzen digun eskaerak hiri-mantentzearekin lotura dute. Horregatik, hiri-mantentzeari buruzko auzo bakoitzaren eskaerak lehen eskutik ezagutzeko eta hobeto eta azkarrago erantzun ahal izateko Auzo Txukuna ekimena sortuko dugu hurrengo legealdian.
Ekimenaren helburua honakoa da: Hiriko auzo guztien zaintza eta mantentze-lanak areagotzea, auzo bakoitzak duen berezitasunak, errealitatea eta beharrak kontuan hartuta. Izan ere, hiriaren zaintza eta garbiketa hobetu behar da, kalez kale, plazaz plaza. Eta hori auzotarrekin elkarlanean egingo dugu, lanak hobeto identifikatzeko eta lehentasunak ezartzeko.
Horretarako, plangintza bat egingo dugu, eta hiritarrei denborarekin abisatuta, auzoz auzo lan zehatza egiteko dauden beharrak jasoko ditugu eta urgentzia dutenak lehenbailehen egingo ditugu, martxan dauden beste hainbat lan amaitu arte itxaron gabe.
Giza-baliabide eta baliabide material bereziak bideratuko ditugu auzo bakoitzetik egiten diren eskaerak eta proposamenak xehetasunez erantzuteko. Beraz, “Auzo Txukuna” ekimenak Auzoetako, Hiri Partaidetzako eta Hiri-mantentze eta zerbitzuetako departamentuen arteko elkarlana sendotuko du, izan ere, modu koordinatuan lehentasunak ezarri eta erabakiak hartuko dira.
Ekimenak egutegi jakin bat izango du, eta martxan jarri aurretik, auzotarrei ezagutzera emango zaie, jakin dezaten noiz helduko zaien euren auzo edo eremuari konponketak egiteko garaia.
Oso harro gaude gure kale, plaza eta parkeez, eta leku horiek guztiak garbiak, irisgarriak eta atseginak izatea nahi dugu. Dena den, eskaera guztiak erantzutea ez da erraza izaten, izan ere, asko eta mota ezberdinetakoak izaten dira. Baliabideak mugatuak dira, baina gure beharra da eskera horiek guztiak hartzea, entzutea, eta ahal bada erantzun egokia ematea.
Hori da hartuko dugun konpromisoa, hiri atsegina eta zaindua izateko. Helburua da, Donostia Europan parerik izango ez duen hiria izatea; bizitzeko, lan egiteko eta elkarrekin gozatzeko.
Kanpainako azken asteari heldu diegu, eta gaurkoan mugikortasunaren gaineko gure konpromisoak aurkeztu ditugu. Hiriko eta hiriarteko zirkulazioaren behar eta erabilera berrietara egokitutako mugikortasun jasangarriaren alde lan egiten jarraituko dugu.
Hortaz, hurrengo legealdirako honako apustuak egiten ditugu: dBusen flotaren elektrifikazioa handitzea, dBizi bizikleta publikoaren zerbitzua urrunago dauden auzoetara eta ekialdera hedatzea, eta trenbidearen igarobidea amaitu ondoren Topoa martxan jartzea. Horrek guztiak garraio “publiko, sozial eta berdearen” sistema bat eratuko du, ibilgailu pribatua erabiltzeko alternatibak eskainiz.
Hiriko mugikortasuna berrantolatu behar da, betiere oinezkoak erdian jarriz, garraio publiko jasangarriago batekin. Izan ere, horrek hiria hobetzeko azpiegitura berriei etekina aterako die, herritarrei egonaldirako eta gozamenerako espazio osasungarri eta seguruak emanez.
Donostiako autobus konpainia kalitatezko garraio kolektiboaren eskaintzaren adibiderik onena da, zalantzarik gabe, eta Europako eraginkorrenetako eta aurreratuenetako bat da. 2025ean, dBusek 12 metroko 41 autobus % 100 elektrikoak izango ditu, hau da, ezaugarri horiek dituen flotaren % 45. Europako finantziazioa duen proiektu honi esker, flotaren eraldaketa ekologikoaren prozesua burutuko da, eta 2025ean flotaren % 55 hibridoa izango da, eta, beraz, 12 metroko flotaren % 100ak teknologia jasangarria izango du.
Donostiarrok mugikortasun garbi, osasungarri eta jasangarriaren alde egiten dugu. Eta horretarako hirian dugun beste zerbitzu arrakastatsuenetako bat dBizi da, eta indartzearen alde egiten jarraituko dugu, ekialdera eta Añorga auzora zabalduta. Guztira 23 geltoki berri ezarriko dira eta 257 bizikleta elektriko gehituko dira, erabiltzaileek gehien eskatzen dituztenak. Eta horrekin batera, bidegorrien sarea zabaltzeko lan egingo dugu, eta Loiola eta Herrera, Altza edo Intxaurrondo, lotzeko beste lotura bat proiektatu dugu, Loiola eta Herrera arteko Topoaren trazadura zaharraren tunelaren bitartez.
Topoaren saihesbidearen iritsierak hiriko mugikortasuna eraldatzeko aukera emango digu. Hiru geltoki berriei esker konexioak handituz zerbitzua hobetzeaz gain, hirian ibilgailu pribatuaren erabilera murrizteko eta, ondorioz, ingurumenerako kaltegarriak diren emisioak murrizteko tresna izango da.
Topoa zabaltzeak donostiarrentzako lur gaineko espazioak berreskuratzea ahalbidetuko du, hala nola Easoko trenbide-hondartzan lortuko diren 21.000m2-ak. Bertan, Arabako parkea zabaltzeko lan egingo dugu, hiriaren erdiguneko biriketako bat zabalduz, eta etxebizitzaren garapena eta kontserbatorio berriaren kokapen posiblea bultzatuz.
Anoeta eta Errondo pasealekuaren artean Topoaren trenbidearen trazadura lurperatzea bultzatzeko konpromisoa hartzen dugu, baita Anoetatik Loiolako Erriberako Topoaren eta Renferen Aldiriko trenen lineen arteko etorkizuneko aldageltokira trenbideko trafikoaren soinu inpaktua minimizatuko duten hesi akustikoak ezartzeko konpromisoa ere.
Horiek dira mugikortasun arloan hartu ditugun konpromisoak, hain zuzen ere elkarlanean burutuko ditugunak, Donostia Europan parerik izango ez duen hiria izan dadin; bizitzeko, lan egiteko eta elkarrekin gozatzeko.
